కరెంట్ లేకుండానే కూలింగ్.. వచ్చేసింది 'నెస్కాడ్' టెక్నాలజీ.. ఇక ఏసీలతో పనిలేదు!

రోజురోజుకు పెరుగుతున్న ఉష్ణోగ్రతల నుంచి ఉపశమనం కోసం ఎయిర్ కండిషనర్లపై (ఏసీ) ఆధారపడటం సర్వసాధారణమైంది. అయితే, విద్యుత్ వాడకం, పర్యావరణానికి వాటివల్ల కలిగే నష్టం వంటి సమస్యలున్నాయి. ఈ నేపథ్యంలో విద్యుత్‌తో సంబంధం లేకుండా చల్లదనాన్ని అందించే ఒక వినూత్న టెక్నాలజీని సౌదీ అరేబియా శాస్త్రవేత్తలు ఆవిష్కరించారు. సౌదీలోని కింగ్ అబ్దుల్లా యూనివర్సిటీ ఆఫ్ సైన్స్ అండ్ టెక్నాలజీ (కేఏయూఎస్‌టీ) పరిశోధకులు అభివృద్ధి చేసిన ఈ వ్యవస్థకు 'నెస్కాడ్' (NESCOD - No Electricity Sustainable Cooling On Demand) అని పేరు పెట్టారు.

ఎలా పనిచేస్తుంది?
ఈ టెక్నాలజీ ఎండోథెర్మిక్ రసాయన ప్రక్రియ ఆధారంగా పనిచేస్తుంది. అమ్మోనియం నైట్రేట్ అనే ఒక రకమైన ఉప్పును నీటిలో కరిగించినప్పుడు, అది పరిసరాల నుంచి వేడిని గ్రహిస్తుంది. ఈ ప్రక్రియలో ఉష్ణోగ్రత గణనీయంగా పడిపోయి చల్లదనం ఏర్పడుతుంది. ప్రయోగాల్లో భాగంగా, కేవలం 20 నిమిషాల్లోనే పరిసరాల ఉష్ణోగ్రతను 25 డిగ్రీల సెల్సియస్ నుంచి 3.6 డిగ్రీలకు తగ్గించి ఈ టెక్నాలజీ తన సామర్థ్యాన్ని నిరూపించుకుంది.

ఈ వ్యవస్థ రెండు దశల్లో పనిచేస్తుంది. మొదటి దశలో అమ్మోనియం నైట్రేట్ నీటిలో కరిగి చల్లదనాన్ని ఇస్తుంది. రెండో దశలో, ఈ ఉప్పు నీటి మిశ్రమాన్ని సౌరశక్తి (సూర్యరశ్మి)కి గురిచేస్తారు. ఎండ వేడికి నీరు ఆవిరైపోగా, అమ్మోనియం నైట్రేట్ తిరిగి స్ఫటికాలుగా మారుతుంది. ఈ స్ఫటికాలను మళ్లీ నీటిలో కలపడం ద్వారా తిరిగి చల్లదనాన్ని పొందవచ్చు. అంటే, ఈ సిస్టమ్‌ను సౌరశక్తితో రీఛార్జ్ చేసుకోవచ్చు. రాయల్ సొసైటీ ఆఫ్ కెమిస్ట్రీలో ప్రచురితమైన నివేదిక ప్రకారం, ఈ వ్యవస్థ చదరపు మీటరుకు 191 వాట్ల వరకు శీతలీకరణ సామర్థ్యాన్ని అందిస్తుంది.

నీటి పునర్వినియోగం అదనపు ప్రయోజనం
ఈ టెక్నాలజీలో మరో ప్రత్యేకత కూడా ఉంది. సౌరశక్తి ద్వారా నీరు ఆవిరయ్యే ప్రక్రియలో, ఆ ఆవిరిని సేకరించి తిరిగి స్వచ్ఛమైన నీరుగా మార్చుకోవచ్చు. ఈ నీటిలో మలినాలు 1 పీపీఎం (పార్ట్స్ పర్ మిలియన్) కంటే తక్కువగా ఉంటాయని పరిశోధకులు తెలిపారు. నీటి కొరత ఉన్న పొడి ప్రాంతాలకు ఇది ఒక వరం లాంటిది. విద్యుత్ సౌకర్యం లేని మారుమూల ప్రాంతాలు, తీవ్రమైన వేడి ఉండే ప్రదేశాలు, కోల్డ్-చైన్ స్టోరేజ్ అవసరాలకు ఈ టెక్నాలజీ ఒక పర్యావరణ అనుకూల పరిష్కారంగా నిలవనుంది.